O pobo de Laias ofrece moitas posibilidades para poder descansar, pasear e descubrir algúns deses sitios pouco coñecidos e que a todos nos gusta encontrar de cando en vez, así como para gozar coas festas e actividades que se celebran tanto na parroquia como nos arredores.
Aquí tendes algunhas suxestións:
VISITAS CULTURAIS E DE LECER:
(PASADE O RATO POR RIBA DAS ESTRELAS)
- NA PROPIA PARROQUIA - Ademais das referencias que tendes na sección de patrimonio, (retablos, cruceiros, cabaceiros, igrexa vella, cova da moura, etc...) e na de arqueoloxía (restos castrexos e romanos), teñen interese as vistas que podemos percibir dende as varias pistas forestais que hai no monte comunal, con penedos curiosos coma o "Penedo da Sela" ou o "Penedo furado" e outras que podemos ir descubrindo se observamos con atención o monte que nos rodea. Preto xa do lugar de Xinzo temos as vellas minas de estaño de As Adegas.
(PINCHAR NA FOTO PARA VER A GALERÍA DE IMAXES.)
Destacar tamén a Área recreativa de Laias. Nela podemos descansar do paseo e gozar das vistas cara ao pobo e o río. Aquí temos a posibilidade de ver algunhas pedras que se trouxeron do monte e que están erosionadas polo paso do tempo, o cal lle deu formas caprichosas.
Xa na parte baixa do pobo, temos o Centro de Ocio GAELS onde podemos gozar de diversas actividades como Paintball, Minigolf, Mountainboarding, Tiro con arco, etc. o Campo do Cabalo coa "BURGA" (tanque con auga quente provinte do manancial), a vella Igrexa Parroquial coa súa portada románica. e o Complexo Termal de Laias.
Xa a carón do río Miño, podemos facer un percorrido polo Paseo Fluvial, que parte da vella igrexa románica e pasando por detrás do Balneario chega ata o pobo veciño da Barca de Barbantes (ten aproximadamente 2,5 km.) e nel podemos observar unha variada vexetación de ribeira.
VISTA DO PASEO FLUVIALPasaremos pola Carballeira dos Presentes, na que hai moitos pés de acibro e mesmo un pozo de auga quente.
Se o que preferimos é facer sendeirismo, temos dúas rutas a escoller: a RUTA DO MIÑO, e a RUTA DO AVIA.
A Ruta do Miño é circular con saída e chegada no Balneario de Laias. A súa dificultade é media-alta, e ten unha lonxitude aproximada de 27 km sendo a cota máxima de 440 m e a mínima de 83 m.
A Ruta do Avia tamén é circular, con saída e chegada en Cenlle. Ten unha lonxitude de aproximadamente 18 km sendo a cota máxima de 480 m e a mínima de 75. A súa dificultade é media.
VISITAS CULTURAIS, DE LECER E FESTAS